Poslovne vijesti - Makedonija

Бензините поскапуваат, ЕЛ и мазутот поевтинуваат, дизелот непроменет

Малопродажната цена на нафтените деривати, освен дизелот, ќе претрпи промена, при што ќе уследи надолна корекција од половина денар, до нагорна корекција за денар и половина.

Регулаторната комисија за енергетика на редовната седница одржана во понеделникот одлучи да се зголеми цената на литар еуросупер-БС 95 за 1,50 денари, на 82,50 денари, а цената на литар еуросупер-БС 98 да се зголеми за еден денар, на 84 денари.

Малопродажната цена на еуродизелот (Д-ЕV) останува иста, односно изнесува 70,00 ден/лит, додека цената на Екстра лесното масло за домаќинство (ЕЛ-1) се намалува за 0,50 денари за литар, и со тоа изнесува 58,50 ден/лит.

Килограм мазут М-1 НС поевтинува за 0,176 ден/кг, со тоа цената на М-1 НС изнесува 41,707 ден/кг.

Во образложението на регулаторите се наведува дека просечната цена на сурова нафта на светскиот пазар во изминатиот 14-то дневен период изнесувала 109,093 $/барел што е е за 2,13 отсто повисока од просечната цена на сурова нафта по која биле формирани тековните цени на нафтените деривати.

Референтните цени на нафтените деривати на светскиот пазар во споредба со изминатиот
четиринаесетодневен период бележат зголемување кај бензинот во просек за околу 4,07 % или за 39,76 $/тон, кај дизелот зголемување во просек за околу 0,96 % или 8,55 $/тон и кај мазутот зголемување во просек за околу 1,13 % или за околу 6,725 $/тон.

Курсот на денарот во однос на доларот во изминатиот 14-то дневен период изнесуваше 46,7549ден/$ и е за 1,66 % понизок од курсот на доларот по кој беа формирани цените.